Byrta vann "Væl á veg"-heiðurslønina

Í ár var tað fløgu-aktuelli tvíbólkurin Byrta, ið er mannaður av Janusi Rasmussen og Guðrið Hansdóttir, sum streyk avstað við "Væl á veg"-heiðurslønini. "Væl á veg"-heiðurslønin verður latin einum uppkomandi bólki, sum spælir á G! festivalinum, og er eitt samstarv ímillum Atlantic Airways og G! festivalin. Tað eru umboð frá G! og øðrum størri útlendskum festivalum, sum velja vinnaran.

Tey nomineraðu í ár vóru umframt Byrta, Dánjal, The Earth Divide, Frostfelt, Hamferð, Høgni, Knút, Lover Lover, Marius, The Absent Silver King, SAKARIS, Sigmund og Benjamin, ið vann í fjør. 

Byrta framførdi hóskvøldið á G! festivalinum. Skrýdd í pelsi og gull-glitrandi kjólum og jakkum leveraðu tey eina minniliga framførslu fyri einum pakkaðum spæliplássi. 

Byrta skal harvið spæla á Iceland Airwaves, sum er størsti íslendski festivalurin og verður hildin í Reykjavík í døgunum frá 30. oktobur til 3. novembur. Festivalurin leggur serligan dent á at varpa ljós á nýggjan íslendskan og altjóða tónleik. Síðan festivalurin varð hildin fyri fyrstu ferð í 1999 í einum hangari á flogvøllinum í Reykjavík, er hann vaksin til at vera ein av størstu pallunum fyri nýggjan tónleik í heiminum. Millum festivalgestirnar eru á hvørjum ári fleiri hundratals miðlafólk og fólk úr tónleikavinnuni.