Sandoyartunnilin í útvarpinum og sjónvarpinum

Bæði útvarpið og sjónvarpið seta øll segl í sambandi við, at Sandoyartunnilin alment verður tikin í nýtslu í dag.

Útvarpið byrjar sína sending klokkan 13.

Gestir eru í útvarpsstovuni, og vit hava eisini fólk í Sandoynni.

Sendingin byrjar á brúnni umborð á Teistanum, har Hansa Hansen hittir Jónleif Láberg, sum hevur verið skipari á Teistanum í mong ár, og sum nú gevst.

Meðan sjálvt hátíðarhaldið er - klokkan 14 til 15 - verður sent frá tí.

Tá hátíðarhaldið er liðugt, hava vit fleiri gestir og beinleiðis samrøður úr Sandoynni.

Hansa Hansen og Tórður Mikkelsen eru í Sandoynni, og í útvarpsstovuni eru Gunnar Nolsøe og Elin Winther Poulsen.

Sjónvarpið

Sjónvarpið byrjar sendingina klokkan 13.30. Sent verður beinleiðis frá hátíðarhaldinum og innsløg, sum eru gjørd í Sandoynni í morgun.

Gestir vera eisini í sjónvarpstovuni. Teir eru Gestur Hovgaard, professari í samfelagsfrøði, við serligari vitan um økismenning, og Rósa Samuelsen, sum var borgarstjóri í Sandavági, tá Vágatunnilin læt upp.

Sent verður, til hátíðarhaldið er av, og vanliga bilferðslan undir Skopunarfirði er byrjað.

John Johannessen er vertur.