- Tíðindi, mentan og ítróttur
Eg reið mær avstað
Í seinna parti av stuttrøðini "Eg reið mær avstað", sum er ein søga um føroyingar og countrytónleik, fæst at vita, hvussu føroyskir sangarar og tónleikarar, við upptøkum sínum í Nashville, seinastu 30 árini, hava lagt lunnar undir ein nýggjan føroyskan countrysamleika.
Tann søgan byrjaði í 1989, tá Jákup Zachariassen einsamallur setti sjøtil á sítt umfatandi samstarv við sonevnda A-liðið í Nashville. Í higartil óbrúktum filmsupptøkum fylgja vit Jákupi Zachariassen í upptøkuhølum í Nashville saman við Halli Joensen og Kristinu Bærendsen - tveimum av best umtóktu føroysku countrysangarunum nú á døgum.
Vit fáa drúgva lýsing av hesum trimum høvuðsnøvnunum á føroyska countrypallinum. Vit síggja eisini mæta A-liðið í Nashville á minniligu ferð síni í Føroyum í 2009. Umframt høvuðspersónarnar sjálvar hitta vit eisini Óla Poulsen, Niclas Johannesen, Birgir Kruse og Petur Rouch í sendingini.
Søgan var fyrstu ferð í sjónvarpinum á heystið 2019.
Eg reið mær avstað
Ein søga um føroyingar og country.
Greitt verður frá, hvussu føroyskir langfarasjómenn, ið fiskaðu á fjarleiðum fyri á leið seksti árum síðani, fingu tokka til tann amerikanska countrytónleikin, sum teir bóru við sær heim undan Ný Foundlandi. Soleiðis birtist ansurin í Føroyum upprunaliga fyri hesum tónleiki.
Hóast countrysiðvenjan man standa sterkari í Føroyum enn í londunum uttan um okkum, gingu kortini fleiri ár til country vaks fram sum ein føroysk tónlistagrein fyri seg. Og her koma vit til aðru útrásina.
"Eg reið mær avstað" var um heystið 2019 sýndur sum biograffilmur bæði í Havnar Bio, Løkshøll í Runavík og í Salti í Suðuroy, og síðani varð søgan send í sjónvarpinum í tveimum pørtum.
Rúni Friis Kjær hevur klipt og sett saman og Finnur Hansen ljóðblandaði. Suni Merkistein hevur lagt til rættis.
