Øl og bøn á G!

Ball, harður tónleikur og enn meira ball er ofta sett í samband við ein festival. Tó umboðar G! ikki bara fólkini, ið drekka seg undir borðið hvørt kvøld. Beint omanfyri pallin á sandinum liggur ein kirkja. Kirkjan er lítil og líkjist einum fjósi.

Í kirkjuni eru ofta prestar ella onnur fólk, sum eru virkin í samkomum til staðar, sum kunnu bjóða eitt prát ella eina bøn.

Jonathan Gaardlykke er vaktur í kirkjuni og letur sera væl at. Hann heldur, at tað er umráðandi at hava kirkju, har sum fólk koma. Hann heldur, at kirkjan onkursvegna fjálgar fjølbroytni á G!

Onkur vildi kanska mett, at kirkjan og lívið á festival-økinum eru mótsetningar, og tað er júst tí, at Jonathan heldur, tað vera umráðandi at hava kirkjuna júst her.

- Tað eru nógv kristin, sum halda seg burtur, tí tey ikki vilja verða skitin av teimum, sum ganga í býnum, og tað haldi eg er skeivt. Tískil er tað umráðandi at fáa brotið múrin millum trúgvandi og "ikki-trúgvandi", sigur Jonathan at enda.

Sí myndarøð niðanfyri - Sonja Wang Hansen og Hanna Vang hava tikið myndirnar