Svara skrivligum fyrispurningum í morgin

Løgmaður og landsstýrisfólk fara at svara fimm skrivligum fyrispurningum í tinginum í morgin. 

Sirið Stenberg í Tjóðveldi spyr Bárð á Steig Nielsen, løgmann, um nakað samskifti er millum føroyskar og danskar myndugleikar um at bøta viðurskiftini hjá teimum, sum sita í Mjørkadali. 

Brandur Sandoy í Fólkaflokkinum spyr løgmann, hvørjar grundgevingar Løgmansskrivstovan hevði í 2016 at geva Heilsutrygd boð um at krevja heilsutrygdargjald frá útisiglarum, sum eisini hava goldið til Folketrygd í Noregi.

Hetta varð gjørt, hóast Kærunevndin í almanna-, familju- og heilsumálum gjørdi øvutan niðurskurð í hesum málinum, sigur Brandur Sandoy. 

Brandur Sandoy spyr Jørgen Niclasen, landsstýrismann, hvør higartil hevur rindað fyri at viðlíkahalda og umvæla grótkastið og brimverjuna, og at rudda grot burtur í innsiglingini í Skopun. Hann spyr eisini, hvør eigur grótkastið á Símunarbukt og brimverjuna á Bergi í Skopun. 

Sjúkrahús og porno

Kaj Leo Holm Johannesen, landsstýrismaður í heilsumálum, skal svara einum skrivligum fyrispurningi frá Bjarna Hammer í Javnaðarflokkinum. Hann vil hava landsstýrismannin at greiða frá broytingunum um at leggja játtanirnar til øll trý sjúkrahúsini undir stjóran á Landssjúkrahusinum at umsita.

Og Helgi Abrahamsen, landsstýrismarður í umhvørvis- og vinnumálum, skal svara einum fyrispurningi frá Steffani Klein Poulsen í Miðflokkinum um at verja børn fyri porno. Hann spyr m.a., hvussu nógv pornografisk ferðsla er á internetinum í Føroyum, t.d. hvussu nógvar leitingar eru eftir pornografiskum tilfari. 

Tingfundurin í morgin verður klokkan 10.