Nýggjur stjóri fyri Landsverk settur

Samd setanarnevnd mælti landsstýrismanninum til at seta Sigurd Leifsson Lamhauge í stjórastarvið, sum 18 onnur eisini søktu.

Nýggi stjórin hevur bundna setningin, at hann skal tillaga og broyta stovnin til nútíðar tørv, menna leiðslu- og fyrisitingarhugburð, og hann skal eisini tryggja og styrkja álitið á stovnin, bæði innanhýsis, millum manna og mótvegis politisku skipanini.

Landsverk hevur verið í stórum ódnarveðri, síðani stjórin varð koyrdur frá, og lyklapersónar meldaðir til løgregluna fyri fíggjargøluna av skúlabyggingini í Marknagili.

Skal endurhugsa tilverugrundarlagið hjá stovninum

Sigurd Leifsson Lamhauge skal eisini standa fyri at endurhugsa sjálvt tilverugrundarlagið hjá Landsverki.

Støða skal takast til hvørjar uppgávur stovnurin  skal loysa, og hvussu tær skulu loysast. 

Eisini skal støða takast til, hvørjir førleikar krevjast á stovninum, og hvussu Landsverk fær sum mest burtur úr teimum.

Hevur áður arbeitt hjá Landsverki

Nýggi stjórin skal lata landsstýrismanninnum í samferðslumálum frágreiðing um hesi viðurskifti í seinasta lagi næsta vár, stendur í tíðindaskrivi frá Samferðslumálaráðnum.

Sigurd Leifsson Lamhauge er útbúgvin verkfrøðingur og Master of Science í management, skrivar Samferðslumálaráðið á heimasíðuni.

Hann hevur áður arbeitt eitt skifti á Landsverki, og hevur annars starvsroyndir sum verkætlanarleiðari í verklags- og byggiverkætlanum í stórum føroyskum og útlendskum fyritøkum, sigur Samferðslumálaráðið.