Avreiðingar minkaðar í virði

Hóast nøgdin av feskum fiski, sum varð avreiddur í januar og februar í ár, í mun til somu tíð í fjør var umleið tann sama, so er virðið 22 milliónir krónur minni í ár, vísir ein uppgerð hjá Hagstovuni.

Teir báðar fyrstu mánaðirnar í ár vórðu seld 9.700 tons av botnfiski, ímóti 10.000 tonsum somu mánaðir í fjør. Virðið í ár er 116 milliónir krónur, í mun til 138 milliónir krónur í fjør.

Í ár vórðu fiskað sløk 1000 tons minni av toski, men meir av upsa, hýsu og øðrum botnfiski. Toskurin var ein triðing minni enn í fjør, og virðið var næstan 20 milliónir krónur minni.

Ein orsøk er ivaleyst at stóru línubátarnir í januar og februar vóru á Flemish Cap, har teir fiskaðu góð 3.000 tons av toski.