Málverjin er uppvaksin í H71, áðrenn hon fór til Haukar í Íslandi í 2021. Eitt ár seinni gekk leiðin til Nykøbing Falster í bestu donsku deildini, har hon hevði ilt við at koma á liðið. Hon skifti til Follo í Norra í 2023, áðrenn EH Aalborg vildi hava hana aftur til Danmark. Har spælir hon saman við Lív Sveinbjørnsdóttir Poulsen.

Enn ein spælari úr talentfabrikkini í Hoyvík. 21 ára gamli bakkurin er stinn í verjuspælinum, har hon fær mestu minuttirnar á landsliðnum. Tó so, hon hevur eisini gjørt vart við seg í føroyska álopinum viðhvørt.

Vongurin er uppvaksin í H71, har hon hevur spælt fyri tað allarmesta. Fór eitt stutt legg til Ajax København, men var skjót aftur í barndómsfelagnum.

Marita Mortensen er einasti bakkurin í føroyska hópinum, sum hevur skotið útfrá sum sítt fremsta álopsvápn. Var sera eyðsýnd við H71 í føroysku kappingini fyri nøkrum árum síðan, men skifti til Vendsyssel í Danmark. Kom seinni aftur til barndómsfelagið, men er nú aftur í Danmark, har hon umboðar oddaliðið, Høj, sum hevur fult stigatal.

31 ára gamli strikuspælarin úr Kyndli er aldursforseti á føroyska liðnum, og telist eisini millum tær við flest landsdystum. Hevur spælt stóran part av sínum hondbóltslívi á strikuni hjá Kyndli, men hevur eisini roynt seg í Aalborg HK og Vendsyssel í Danmark.

Spælarin úr Olsen-hondbóltsfamiljuni í Vestmanna hevur spælt í VÍF fyri tað mesta. Er vongur, men hevur eisini roynt seg í bakketuni. Fylgdi pápa sínum, Inga Olsen, til H71 í 2021/22, tá VÍF ikki hevði lið við kvinnum í bestu deildini. Eftir meistaraár og spennandi evropeiskt ævintýr, fór hon aftur til VÍF.

Súni Krossteig Hansen er uppvaksin í Kyndli, men síðstu árini hevur hon roynt seg í Danmark. Fyrst í Aalborg, og síðan í Ajax København. Tá høvuðsstaðarfelagið flutti niður, skifti bakspælarin til Skanderborg Håndbold. Hevur eyðsýndar dygdir í gjøgnumbrotsspælinum, men hevur drigist við fótliðsskaða undan endaspælinum, sum kann avmarka hennara spælitíð.

Ein av størstu profilunum í føroyskum hondbólti síðstu nógvu árini. Gjørdi eitt legg í Haukar í Íslandi í 2018, men hevur annars bert spælt í kyndlagrønum, har hon eigur stóran lut í nógvum meistara- og steypagullum. Er upprunaliga vongur, men hevur spælt bakkur í nøkur ár, og verður kanska at síggja á føroyska bakplássinum í løtum undir EM.

Brynja Høj hevur umboðað Neistan alt sítt hondbóltslív, og er sæst sum oftast í hørðum nærdystum í miðverjuni, har hon telist millum lyklaspælararnar hjá Føroyum. Telist millum leiðaratýpurnar í føroyska hópinum.

Stóri strikuspælarin hevur búð og spælt hondbólt í Danmark alt sítt lív, men føroysku røturnar gjørdu, at hon fekk sín fyrsta dyst fyri Føroyar í 2016, og síðan hevur hon verið føst fús í hvítum 42 ferðir. Hevur umboða Vendsyssel, Randers og nú København Håndbold í bestu donsku deildini. Er liðskipari.

Einasti lámi bakkurin í føroyska hópinum, og gevur tí øðrvísi møguleikar á høgra bakki. Er uppvaksin í Neistanum, men skifti Randers HK í donskum hondbólti fyri kortum. Telist millum tær minni royndu á landsliðnum.

Vestmenningurin hevur fingið hondbóltin inn við móðurmjólkini í VÍF, men fór niður til Herning-Ikast sum blaðung. Spældi seinni tvey ár í Ajax København, eitt í TMS Ringsted og nú spælir vongurin saman við m.a. Anniku Fríðheim Petersen í EH Aalborg.

Bakkurin úr Hoyvík spælir mest í verjuni, har hon saman við tvíburðasystur síni, Vár, stóð sum ein múrur í H71 í nøkur ár. Fór niður at spæla, men varð óheppin og sleit krossbandið. Er komin í gongd aftur í Ajax København, og kom inn aftur í hópin í síðstu løtu.

19 ára gamli vinstri vongurin telist millum yngstu spælararnar í lutfalsliga unga føroyska hópinum. Hevur higartil bert umboðað H71, har hon ígjøgnum ungdómsárini eisini hevur spælt sum spælskipari.

Telist millum feskastu landsliðsspælararnar í EM-hópinum. Spælir bakkur, og í landsliðshøpi er hon helst best kend fyri síni tryggu brotskøst.

Eisini ein av nýggju týpunum á føroyska landsliðnum. Gott eyga fyri spælinum, kann bróta ígjøgnum sjálv og skjýtur eisini útifrá viðhvørt. Hevur stýrt neistaálopinum í nøkur ár, áðrenn hon fór til HH Elite í Danmark.

Nummar 77 er stóra stjørnan og flaggberin fyri nýggja ættarliðið hjá føroysku hondbóltskvinnunum. Er kvik og gjøgnumbrotssterk og skal bera tyngstu byrðuna í føroyska álopinum. Er uppvaksin í H71, men skifti til Viborg HK í bestu donsku deildini, har hon er í gongd við sítt annað kappingarár.

Rakul Wardum spældi við Kyndli, áðrenn leiðin tíðliga gekk til Skanderborg í Danmark. Í 2022 fór málverjin víðari til Ajax København, sum flutti niður í næstbestu deildina. Rakul Wardum spælir í nú við Ringkøbing.